ბოლო დღეების განმავლობაში, პატრიარქის შესახებ უამრავი უცნობი და გულისამაჩუყებელი ისტორია ვრცელდება. თითოეულ ადამიანს, ვინც კი ერთხელ მაინც შეხებია უწმინდესს, საკუთარი, განსაკუთრებული მოგონება აქვს. გამონაკლისი არც მსახიობი ეკა ქუთათელაძე აღმოჩნდა, რომელმაც „დილის პალიტრის“ ეთერში პატრიარქთან დაკავშირებულ უძვირფასეს წუთებზე ისაუბრა. მისი ოჯახური კავშირი პატრიარქთან წლებს ითვლის და ეს ურთიერთობა ბევრად უფრო ღრმა და მრავლისმთქმელია, ვიდრე უბრალოდ მრევლისა და მოძღვრის დამოკიდებულება.
ეკა ქუთათელაძის მეუღლე, მამა ნიკოლოზი, სასულიერო პირი გახლდათ, რამაც მათ ოჯახს პატრიარქთან განსაკუთრებული სიახლოვე შესძინა. მსახიობი იხსენებს, რომ მისი 13 შვილიშვილიდან შვიდი სწორედ პატრიარქის ნათლულია. ყოველი ნათლობა მათთვის არა მხოლოდ რელიგიური რიტუალი, არამედ უდიდესი ზეიმი იყო, რადგან უწმინდესთან ურთიერთობისა და მისი მადლის მიღების კიდევ ერთ შესაძლებლობას აძლევდათ. დროთა განმავლობაში, ეს კავშირი იმდენად გათბა, რომ პატრიარქი მათთვის ბაბუასა და მამასავით ახლობელი გახდა.
მსახიობი განსაკუთრებული სიყვარულით იხსენებს თავის ვაჟებს, რომლებიც პატრიარქის სტიქაროსნები იყვნენ. უფროსი არჩილი და უმცროსი ალექსანდრე მუდამ უწმინდესის გვერდით ტრიალებდნენ. განსაკუთრებით თბილი დამოკიდებულება ჰქონდა პატრიარქს პატარა ალექსანდრეს მიმართ, რომელსაც სულ აჩეჩილი თმები ჰქონდა. სიონში წირვის დროს, ხშირად სთხოვდნენ ხოლმე, რომ პატრიარქს სწორედ ალექსანდრე დახვედროდა, რადგან მისი დანახვა უწმინდესს ყოველთვის კარგ განწყობაზე აყენებდა. პატარა ბიჭი ლანგარზე დასვენებული ჯვრით ხვდებოდა, პატრიარქი კი ღიმილით გადაუსვამდა ხოლმე თავზე ხელს და ასე, დადებითი ემოციით შედიოდა ტაძარში.
ერთ-ერთი ყველაზე ამაღელვებელი ეპიზოდი მამა ნიკოლოზის დაჯილდოებას უკავშირდება. ამაღლების ტაძარში დღესასწაულზე მისულმა პატრიარქმა სრულიად მოულოდნელად გამოაცხადა, რომ მამა ნიკოლოზის დაჯილდოება სურდა. მან საკუთარი მკერდიდან მოიხსნა ჯვარი და ეკას მეუღლეს დაკიდა, რაც უდიდესი პატივი და ნდობის ნიშანი იყო. ასევე დაუვიწყარია პატრიარქის მზრუნველობა მძიმე წუთებში. როდესაც მამა ნიკოლოზი ავარიაში მოჰყვა და საავადმყოფოში მძიმე მდგომარეობაში იმყოფებოდა, პატრიარქი პირადად მივიდა მასთან. მან მიიტანა წმინდა გიორგის მირონმდინარე ხატი, რომელსაც დღემდე ატყვია მირონის კვალი. გასაოცარია, რომ პატრიარქის სტუმრობის შემდეგ მამა ნიკოლოზი მალევე გამოჯანმრთელდა.
თავად ეკა ქუთათელაძეს დიდი შინაგანი ბრძოლა ჰქონდა საკუთარ პროფესიასთან დაკავშირებით. იგი ფიქრობდა, როგორ შეხედავდა მრევლი მღვდლის მეუღლეს, რომელიც სცენაზე დგას და მსახიობია. ამ გაორების შესახებ მას არავისთვის უთქვამს, თუმცა პატრიარქმა, როგორც ყოველთვის, უთქმელად იგრძნო მისი სულიერი მდგომარეობა. ერთხელ უწმინდესმა დაუბარა და ჰკითხა: „შენ ვინმე რამეს გიშლის? რატომ გაქვს გაორება. შენ შენს საქმეს კარგად აკეთებ, შენ ცუდ რამეს გააკეთებ? აბა რატომ არ გინდა ისევ იდგე სცენაზე და სიყვარულით ემსახურო ხალხს?“. ეს სიტყვები მსახიობისთვის უდიდესი შვება და სტიმული აღმოჩნდა.
პატრიარქის ფენომენი იმაში მდგომარეობდა, რომ იგი ყველასთვის პოულობდა საერთო ენას – ბავშვთან ბავშვი იყო, მოხუცთან კი მოხუცი. იგი თანაბარი სიყვარულით ეპყრობოდა ყველას, მათ შორის სიონის კიბეებთან მყოფ მათხოვრებსაც, რომლებსაც ყოველთვის ერთნაირად ურიგებდა მოწყალებას. ეკა ქუთათელაძე ასევე იხსენებს, როგორ დაავალა პატრიარქმა მას სცენარის დაწერა საქართველოს ისტორიის შესახებ – „დასაბამიდან დღემდე“. მართალია მაშინ პროექტის განხორციელება ვერ მოხერხდა, მაგრამ დღეს მსახიობი ამ საქმის დაწყებას თავის სტუდენტებთან ერთად გეგმავს, რათა პატრიარქის სურვილი და კურთხევა ბოლომდე აღასრულოს.
