მსოფლიო ჩემპიონის, ილია თოფურიასა და მისი ყოფილი მეუღლის, ჯორჯინა უზკატეგის გარშემო ატეხილი სკანდალური სასამართლო პროცესი, რომელიც თვეების განმავლობაში საერთაშორისო მედიის ყურადღების ცენტრში იყო, ოფიციალურად დასრულდა. მხარეებმა საბოლოო შეთანხმებას მიაღწიეს, რაც ნიშნავს, რომ ქართველი მებრძოლისთვის სამართლებრივი ბარიერები მოხსნილია და ის კარიერას სრულფასოვნად უბრუნდება.
კონფლიქტი ჯერ კიდევ 2025 წელს დაიწყო, როდესაც წყვილის სოციალური ქსელებიდან საერთო ფოტოები გაქრა, რასაც მოჰყვა ჯორჯინას მხრიდან მწვავე ბრალდებები და სარჩელი. სასამართლო დავა მოიცავდა როგორც ფინანსურ და ქონებრივ საკითხებს, ასევე ყველაზე მგრძნობიარე თემას — საერთო შვილის მეურვეობას. ესპანური გამოცემების, მათ შორის Marca-ს და OKDiario-ს ცნობით, ჯორჯინა უზკატეგიმ ოფიციალურად გამოიხმო საჩივარი ძალადობის შესახებ, მას შემდეგ, რაც მხარეებმა კლასგარეშე მორიგებას მოაწერეს ხელი.
სასამართლომ უმნიშვნელოვანესი გადაწყვეტილება მიიღო ბავშვის საცხოვრებელ ადგილთან დაკავშირებით. მიუხედავად იმისა, რომ ჯორჯინა უზკატეგი შვილის აშშ-ში, კერძოდ მაიამიში გადაყვანას ითხოვდა, მოსამართლემ ეს მოთხოვნა არ დააკმაყოფილა. დადგინდა, რომ ბავშვი დარჩება ესპანეთში და ქვეყნის დატოვება სპეციალური ნებართვის გარეშე აეკრძალება. ამასთანავე, ილია თოფურიას მიეცა შვილთან ურთიერთობისა და მისი ნახვის ფართო უფლება, რაც მებრძოლისთვის ერთ-ერთი უმთავრესი პრიორიტეტი იყო.
რაც შეეხება ფინანსურ მხარეს, გავრცელებული ინფორმაციით, ყოფილი მეუღლეები შეთანხმდნენ ქონების გაყოფაზეც. ცნობილია, რომ გასაყიდად გამოიტანეს მადრიდში მდებარე მათი საერთო სახლი, რომლის საბაზრო ღირებულება დაახლოებით 3 მილიონ ევროს შეადგენს. დავის დასაწყისში ჯორჯინა თოფურიას აქტივების 50%-ს ითხოვდა, თუმცა საბოლოო შეთანხმების დეტალები კონფიდენციალური დარჩა.
ამ რთული პერიოდის განმავლობაში ილია თოფურია აცხადებდა, რომ ის გახდა „მძიმე და მიუღებელი ზეწოლის მსხვერპლი“, მათ შორის ცრუ ბრალდებების მუქარით. ჩემპიონმა ხაზგასმით აღნიშნა, რომ ყველა მტკიცებულება — აუდიოჩანაწერები და დოკუმენტაცია — სასამართლოს წარედგინა სიმართლის დასამტკიცებლად. დღეს, როდესაც სამართლებრივი ბრძოლა მოგებულია, თოფურია სოციალურ ქსელში ადასტურებს, რომ აქტიურად უბრუნდება ოქტაგონს და ემზადება მომავალი ბრძოლებისთვის, სავარაუდოდ, ჯასტინ გეიჯის წინააღმდეგ. ამრიგად, ქართველი „მატადორისთვის“ ცხოვრების ეს რთული ეტაპი ჩაბარდა წარსულს და ის კვლავ სპორტულ მწვერვალებზე ორიენტირდება.
